الووووو الحاج زعرور الجزار ، لأ يا عم الحج النمره غلط
شبكات
المحمول او الموبايل زي الناس السيكي ميكي ما بتقولها (سيكي ميكي يعني
الناس الذوات) تخيل ان منى زكي او عمرو دياب يجيلهم واحد صعيدي بالسلوفانه
بتاعته يرنلهم بالغلط على الموبايل ، يا ترى ايه شكل الحوار الي هيدور
بينهم؟
الو الحاج طنطاوي بتاع السمك
مشكله
اكيد حصلت معانا كلنا ، تلاقي رقم غريب بيتصل بيك الوضع الطبيعي انك هترد
عليه المفاجأة الغير طبيعيه انك هتلاقي واحد بيكلمك من الواضح انك متعرفوش
(من اللهجة) وبيسأل على واحد انت متعرفوش او تلاقي واحده بتسأل على واحده
انت متعرفهاش (طبعا ساعتها ممكن تصطاد في الميه العكره) ياريت قبل ما تاخد
اي رد فعل عدواني مع الي بيكلمك تعرف ان الشبكة قد تكون هيه المشكله.
شبكات المحمول عندنا
احنا
عندنا في مصر 3 شبكات محمول (ام نبيل ، فوده فون ، امتصاصات) وبصراحة
ميتخيروش عن بعضهم خدمة العملا واحده ، اسعار الكروت واحده ، ودلوقتي طبقو
نظام زيتنا في دقيقنا وتقدر تبقى مع فوده فون برقم ام نبيل.
شبكة ام نبيل:
من
اولى الشبكات الي ظهرت في مصر والاكثر مبيعا حتى الان بيقولو 10 مليون
(اشك في الموضوع ده) مشكلتها العظمى ان تجميع الارقام ساعات كتير بتلاقيه
غلط بمعنى انك ممكن تكلم واحد صاحبك تلاقي واحد تاني متعرفوش بيرد عليك
ومن الطرف التاني نفس القصه صاحبك هيلاقي واحد ميعرفوش بيكلمه في نفس
الوقت. طبعا القصه دي ممكن تعمل مشاكل كتير وخصوصا لو كان في طرف انثوي في
الموضوع (بتبقى زلابيه)
اسعار الكروت:
المفروض انك بتشتري الكارت بنفس الرقم الي مكتوب عليه وتاخد نفس القيمة
المكتوبة برضه عليه انما في تجار تجزئة كتير جدا جشعين بيزودو بتاع جنيه
او نص جنيه عن تمن الكارت (غصب واقتدار ، ربنا ينتقم منهم) ويا اما تاخد
الكارت يا اما تفرجه على جمال خطوتك وهيلاقي ناس تانيه تشتري برضه.
التغطيه:
محصلش معايا ان تغطية موبينيل كانت سيئة في اي مكان رحته يمكن مره واحده
بس لما تليفوني كان فيه عطل بيسبب ان الشبكة بتضعف ، في ناس كتير بتشتكي
ان موبينيل مش كويسه في الاماكن المغلقة (لو انت عندك فوبيا من الاماكن
المغلقة ممكن تستعملها لأنك مش هتتجمع مع التليفون في مكان مغلق)
العروض الترويجيه: موبينيل تعتبر الشركة رقم واحد في العروض الترويجيه ومعظم عروضها مغريه بس نصيحة بلاش موبينيل لأن ليا معاها تجارب مُره
الانترنت: شبكة موبينيل في الانترنت سيئة وبطيئة غير ان على حد علمي لسه مشتروش رخصة الـ3G
، غير كده ان علشان تنزل البرامج الخاصه للاتصال بالانترنت لازم تكلمهم
وتقولهم نوع التليفون واسمك ايه وهتعمل ايه بالانترنت وقصص ملهاش لزوم من
الاخر لو انت هتستعمل الانترنت كتير على الموبايل متستخدمش موبينيل
شبكة فوده فون
زمان
كان ليها اسمين تانيين (مصرفون و ترك اف إع إخص) وتعتبر الشبكة رقم اتنين
في مصر من اكبر المشاكل فيها كروت الشحن واي حاجه متعلقة بالفلوس ، ممكن
كتير جدا تشحن كارت تلاقيه مشحون قبل كده او يقولك انه اتشحن وبعدها
بساعتين تلاقي الرصيد مش موجود وتدوخ في 50 مكالمة لخدمة العملا الي ملهاش
لزوم من اصله عندهم (وجودهم زي قلتهم) وبرضه مش هتاخد حق او باطل معاهم
خصوصا في موضوع الفلوس (سلومه الاقرع ميعرفش ابوه)
اسعار كروت الشحن:
هما اعلنو ان كروت الشحن بتاعتهم بقت بنفس القيمة المكتوبه على الكارت
انما هيهات ابقى قابلني لو عرفت تشتري كارت بنفس القيمة المكتوبه عليه.
التغطيه:
في بعض المناطق مفيهاش لسه تغطيه فودافون زي التجمع التالت مفيش تغطيه
كويسه هناك وبعض المناطق النائيه مع انها المفروض مغطيه مصر زي موبينيل
بالظبط ، وساعات بتلاقي الشبكة واقعه لوحدها من غير سابق انذار ولا احم
ولا دستور.
العروض الترويجيه:
تقريبا شبكة فودافون لو عليها مش عايزه تعمل اي عروض ترويجيه (معتمده على
الاسم) انما لازم تساير الموجة مع موبينيل علشان لو معملتش كده مش هيلاقو
حد يشتري منهم خطوط. بمعنى اصح فودافون عروضها تبعيه لعروض موبينيل.
الانترنت:
اولا لو عايز تشغل الخدمة برضه لازم تكلمهم ويعملولك تحقيق ونوع التليفون
واشتريته منين وبكام والحوارات الفاشله دي. نيجي بقى للخدمة عظيمة عظيمة
عظيمة كل الي هقوله ان الشبكة بتقطع وسرعتها بطيئة جدا مع انهم اشترو رخصة
3G مؤخرا (اشك في كده)
امتصاصات:
الشبكة
التالته الي طال انتظارها والي حصل عليها جدل كبير جدا ، انما بصراحة
تستاهل طول الانتظار. حتى الان خبرتي مع خدمة العملا جيده جدا ، محصلش اني
قفلت السماعه معاهم وانا متضايق من الخدمة.
اسعار كروت الشحن:
في معظم الاماكن بنفس القيمة المكتوبه على الكارت ، اصلا الشركة بتقولك في
الاعلان متشتريش لو اكتر من القيمة المكتوبه على الكارت ، انما برضه في
شوية تجار جشعين (في اتصالات لازم تقولهم لأ الكارت تمنه كذا متشتغلنيش).
التغطيه: في البدايه التغطية مكنتش كويسه جدا بس كل يوم في تحسن في الخدمة وفي التغطيه
العروض الترويجيه:
الشبكة عروضها الترويجيه قويه جدا وحاليا موبينيل وفودافون همه الي
بيسايرو الموجه بتاعت اتصالات (قبل كده كانو بينقطو على الناس والي مش
عاجبه يتصل من التليفون ابو قرص)
الانترنت:علشان تنزل البرامج الخاصة بالانترنت عندك اي حل من الاتنين
الاول في رقم ممكن تبعتله رساله وينزلك البرامج دي لو ملكش مزاج تكلم خدمة العملا
التاني
هتكلم خدمة العملا مجرد ما هتقوله انك عايز تنزل برامج الانترنت هيقولك
نوع التليفون وهيحصل ايه بالظبط وازاي تنزل البرامج عندك. اما بالنسبة
لسرعة الانترنت فهي في معظم الاحوال كويسه جدا ، ساعات بتقع وساعات بطيئة
بس في معظم الاحوال الانترنت جيده جدا. غالبا هتشتغل بـ3G انما سرعتها كويسه مقارنة بـ3.75G
حرامي فوده فون
في واحد نصاب في شبكة فوده فون بيعمل حركة وحشه جدا مع الناس (حصلت بالفعل)
ممكن
تلاقي تليفونك بيرن ويكلمك واحد يقولك احنا شبكة فودافون (خلو بالكم الشخص
ده لبق جدا) وانت كسبت معانا مبلغ 2000 جنيه او اي حاجه تانيه بس لازم
تكمل النقط بتاعتك معانا ، طبعا انت هتاكل الطعم وتقوله طيب واكمل النقط
دي ازاي هيقولك اشتري كارت شحن وهتسترد قيمتهم لما تروح شركة فودافون طبعا
انت يا طيب يا غلبان هتصدق لأن الراجل ده اسلوبه مقنع جدا ، بعد ما هتنزل
تشتري الكارت هيقولك اديني الرقم المسلسل بتاع الكارت (رقم الباركود)
هتمليه الرقم ، يقولك اوكي ممكن تيجي بكره تستلم الجايزه في اي فرع من
فروع فودافون. طبعا هتروح الفرع يا ولداه هيقولولك مفيش مسابقة ولا اي
حاجه ولو فكرت تيجي تشحن الكارت هتلاقيه خلاص طار مع الي طار ، طبعا هتروح
فودافون تشتكي وتقولهم عايز فلوسي هيقولولك راحت عليك يا سيد ، تسألهم طيب
مين صاحب الخط ده هيقولولك المعلومات بتاعت العملا بتوعنا كونفدينشيال
تقولهم طيب الكارت معايا اهو وانا مشحنتوش هيقولولك ملناش فيه.
المهم خليك حريص جدا لو واحد كلمك وقالك احنا شبكة فودافون لازم تلاحظ الاتي
اولا: لازم الرقم الخاص بالشركة يكون Private Number
ثانيا:
متقولش لأي حد يكلمك مهما كان رقم كارت شحن على التليفون حتى لو قالك انا
صاحب الشركة نفسها وحتى لو كان صوته مشابه لصوت صاحب الشركة.
نصائح عامه للتعامل مع معاكسات التليفون
اولا: لو رقم غريب كلمك في التليفون متردش علطول استنى شويه ممكن الي بيكلمك ياخد باله انه طالب رقم خطأ
ثانيا:
لو اتصلت بحد ولقيت الرقم جمع غلط وواحد تاني رد عليك اعتذر بأدب واقفل
الخط لو رنلك تاني علشان يشتغلك افتح الخط وسيبه مفتوح (علشان تطيرله
رصيده علشان يحرم)
ثالثا:
لو واحد سخيف بيعاكسك باستمرار حاجه من الاتنين يا اما تنفضله ومتردش عليه
يا اما تفتح عليه ومتحطش السماعه على ودنك (افتح الخط وسيب التليفون)
رابعا: لو واحد كلمك وقالك احنا عاملين مسابقة ومش عارف ايه بص على رقمه الاول لو Private Number
يبقى في احتمال انه يكون صادق لو رقم عادي او حتى مميز ممكن تشتمه براحتك
لأنه عايز ينصب عليك. او ممكن لو انت مؤدب قله شكرا مش عايز اشترك.
خامسا: لو واحد طلبك وقالك انت مين خش فيه شمال وقوله انت الي مين (لازم تعرف مين الي بيكلمك قبل ما تقول انت مين)
موضوع: ، لأ يا عم الحج النمره غلط 
الثلاثاء 22 ديسمبر - 17:51